Svæðið

Costa Blanca ströndin eða "hvíta ströndin" eins og hún nefnist í íslenskri þýðingu liggur við suðaustur strönd Spánar og teygir sig 200 km meðfram Miðjarðarhafinu. Strandlengjan er í Valencia sýslu en meginland Spánar skiptist niður í 15 sýslur. Valenciasýsla skiptist síðan niður í 3 héruð sem viðkomandi höfuðborgir heita eftir. Castellon í norðri, þá Valencia og síðan Alicante í suðri. Oft er miðað við að Costa Blanca afmarkist við borgirnar Valencia í norðri og Murcia eða La Manga skagans í suðri. Hér að neðan verður ítarlegri umfjöllun um svæðið, áhugaverða staði, vegakerfi, akstur og vegalengdir á Spáni. 

Costa Blanca norður
Svæðið sem afmarkast frá Valencia  í norðri og Alicante  í suðri er oft nefnt Costa Blanca norður en svæðið tilheyrir Valenciasýslu eða "comunidad Valencia".
Norðurhluti Costa Blanca svæðisins einkennist af miklu fjalllendi og einstakri strandlínu. Einnig er það einkennandi fyrir þetta svæði að öll byggð er lágreist og að greina má annan byggingarstíl húsa á þessu svæði. Fasteignir á svæðinu eru einnig oft mun veglegri og íburðarmeiri en þekkist á Costa Blanca suðursvæðinu en flest hús á þessu svæði bera hinn svokallaða “ valencia byggingarstíl”.
Helstu stórborgir svæðisins eru Alicante í suðri og Valencia í norðri en þær tengjast hvor annarri með hraðbrautinni A7 sem í raun nær alveg frá landamærum Frakklands í norðri og syðsta odda Spánar í suðri. Af hraðbrautinni liggja síðan aftur margar afreinar í ýmsa strandbæi sem vert er að heimsækja. Það er til að mynda stórfenglegt að aka strandlengjuna og koma við í strandbæjunum. Á þessu svæði upplifir maður oftar en ekki hinn gamla Spán ef svo má að orði komast.
 
Helstu borgir og bæir í Costa Blanca norður eru:
 
Valencia, Denia, Jávea, Calpe, Altea, Benidorm, Albir, Alcoy, Alicante

Costa Blanca suður
Oft er talað um að Costa Blanca suður afmarkist af borginni Alicante í norðri og Murcia í suðri. Svæðið stendur flestum Íslendingum nærri en Costa Blanca norður svæðið þar sem þúsundir Íslendinga eiga fasteignir á þessu svæði.
Costa Blanca suður svæðið er mjög víðfemt svæði þar sem landslagið er láglendara en norður svæðið. Einkenni þessa svæðis hefur löngum verið strandirnar og saltvötnin en flestar strandir þessa svæðis hafa verið verðlaunaðar með Bláa Fánanum frá Evrópusambandinu. Til að hljóta þennan heiður þurfa svæði að uppfylla strangar kröfur um hreinleika sjávar.  

Löngum hefur verið vinsælt að baða sig í saltvötnunum vegna góðra áhrifa leðjunnar og saltsins gagnvart hinum ýmsu sjúkdómum eða svipað og íslendingar þekkja frá Bláa Lóninu.

Það má einnig segja að það sé eftirtektarvert hve uppbygging hefur verið hröð og mikil á Costa Blanca suður svæðinu en mesti hagvöxtur í kringum 2000 - 2004 innan Spánar og Evrópu var á Costa Blanca suður svæðinu. Mikið hefur verið byggt og því mikið um nýlegar byggingar og ný hverfi sem teygja sig æ meira suður á bóginn meðfram strandlengjunni og inn í land. Öll hverfi eru lágreist en íbúum svæðisins fer stöðugt fjölgandi þar sem æ fleiri evrópubúar hafa uppgötvað kosti svæðisins, flytjast búferlum og skjóta þar rótum. 

Costa Blanca suður svæðið nær yfir alla flóruna eða allt frá dæmigerðum spænskum þorpum til stórra nútímalegra borga og bæja. Þess má geta að víða hafa alþjóðleg fyrirtæki og verslanir opnað útibú á þessu svæði en fyrirtæki þessi hafa verið þess áskynja hve evrópubúum fjölgar hratt á þessu svæði. Sem dæmi má nefna að nýlega opnaði ein stærsta verslunarmiðstöð Spánar á Torrevieja svæðinu og Ikea stórverslunin er í borginni Murcia .  
 
Helstu bæir og borgir sem vert er að skoða:
Alicante, Elche, Santa Pola, La Marina, San Miguel, Torrevieja, Murcia, Cartagena 



Áhugaverðir staðir
Á öllu Costa Blanca svæðinu eru ótalmargir áhugaverðir staðir sem vert er að skoða en auðvitað fer það eftir áhugasviði hvers og eins hvaða staðir teljast áhugaverðir.
Við viljum nefna hér nokkra staði sem eru sérstakir fyrir það hve einstakir þeir eru:

Guadalest: 
Guadalest er eitt sérstæðasta fjallaþorp Spánar. Íbúar þorpsins eru aðeins um 200 talsins en yfir tvær milljónir ferðamanna heimsækja þorpið á hverju ári sem gerir Guadalest að einum fjölsóttasta ferðamannastað Spánar.

Það er mjög tilkomumikið að aka leiðina upp að Guadalest en ekið er sem leið liggur framhjá "Terra Metica" skemmtigarðinum og afleggjaranum niður til Benidorm og beint upp til fjalla. Vegurinn til Guadalest er malbikaður en liggur oft bugðóttur utan í bröttum hlíðum fjallsins. Það er mjög eftirminnilegt að aka þessa leið. 
Í Guadalestþorpinu er gamalt máravirki frá 8.öld, byggt á kletti í um 900 metra hæð yfir sjávarmáli. Eru kastalarústirnar til vitnis um stormasama sögu þess. Þræða þarf um fimm metra löng göng í gengum klett til þess að komast að elsta hluta þorpsins, en efst trónir krikjugarðurinn sem býður upp á einstakt útsýni yfir Guadalest dalinn ognærliggjandi sveitir. Frægastur er turninn "Peñon de La Alcalá" sem var notaður til að fylgjast með mannaferðum í dalnum fyrir neðan.

Einnig er að finna í þorpinu tvö söfn, "smámunasafnið Belen" og pyntingasafn. Það er mikil upplifun að koma inn í safnið þar sem litlu dúkkuhúsin eru til sýnis. Þau eru með öllum smáatriðum og svo á hæðinni fyrir ofan er búið að útbúa stórt fjallaþorp úr þessum litlu húsum og öllu tilheyrandi. Þorpsbúar eru frægir fyrir handverk, t.d. handsaumaða dúka, körfugerð og barnaföt. Hægt er að nálgast vörurnar í verslunum sem eru við þröngar götur þorpsins þar sem þær eru höggnar inn í bergið.
 

Algar Fossar:
Algar fossar eru stórkostleg náttúruperla upp í fjöllunum fyrir ofan Altea en ekin er sama leið eins og farið er upp í fjallaþorpið Guadalest. Það er því mjög góð dagsferð að heimsækja fyrst Guadales og fara síðan í Algar fossana. Þar er hægt að synda í tæru og köldu vatninu og hoppa af klettum ofan í djúpa hyli og skemmta sér konunglega.  Göngustígar eru meðfram fossunum þar sem hægt er að ganga upp með ánni og finna sér minni laugar til að synda í. Það er ekki auðvelt að finna þvílíka náttúruperlu sem þessa.
Þegar maður kemur að fossunum eru nokkrir veitingastaðir, barir, lítið járnbrautar safn og minjagripabúðir sem selja ýmsan varning og þar á meðal "nisperos" þar sem það eru mjög margir nispero lundir í nágrenni fossanna. Mikil gróðursæld er í nágrenni fossanna og hægt að ganga að safninu “Arboretum” sem er náttúrulegur kryddjurtagarður þar sem hægt er að finna flestar kryddjurtir miðjarðarhafsins. Þar er líka lífrænt safn með lækningar- og aromatic jurtum, olíum og ilmvötnum.  Hægt er að kaupa þær vörur sem þar er verið að sýna.
Við fossana er einnig búið að útbúa góða aðstöðu fyrir fólk þar sem upplagt er að borða nedtið sitt en þar eru borð, bekkir og grillaðstaða ásamt klósettum og sturtum.
Canalobre dropahellarnir: 
Nærri Busot (um 3 km) og um 24 km norður af Alicante eru Canelobre hellarnir sem eru stórfenglegir dropahellar. Leiðin að hellunum er víðast hvar vel merkt en gott er að setja stefnuna á Busot ef ekið er eftir korti. Stærsti hellirinn “Cuevas del Canalobre”  er um 150 metrar að lengd og þar eru miklir dropasteinar eða ofvaxin krýlukerti. Þessi stóri hellir sem er vel upplýstur í miklum litum hefur einskæran hljómburð og þar eru oft haldnir tónleikar og hátíðir en í hellinum er rúmgott svið. Inngangurinn í hellana er hátt uppi í hlíðum “Cabezón de Oro (Golden Head) eða í 700 metra hæð yfir sjávarmáli og þaðan hafa gestir hellana mikið útsýni yfir Alicante hérað og til Miðjarðarhafsins. Þó skal það ítrekað að yfir hásumarið getur verið mikil mannmergð á svæðinu og loftslagið þurrt og heitt þannig að gott er að hafa vatnflöskuna sér við hlið.

Þegar komið er inn í dropahellana er leiðsögumaður sem leiðir gestina í hóðum um hellana um segir frá öllu því sem augum ber um leið og gengið er um hlykjótta 170 metra leið um göngustíga hellana. Þess má geta til fróðleiks að þessi stórmerkilegu dropasteinar hafa myndast á milljónum ára með þeim hætti að vatnið sem dropar niður  innheldur óvenju mikið magn steinefna og við það hefur vatnið umbreyst í þessar steinastrýtur. 
Nokkrir göngustígar eru í næsta umhverfi við hellana og gaman er að ganga þar um. 
Hellarnir eru opnir allt árið um kring. Frá og með 1.október til 20. júní eru opnunartímar 
frá 11:00 til 17:50. Aðra daga ársins er opnunartíminn frá 10:30 til 19:50. 
Els Arcs 
Þessi áhugaverði tvöfaldi klettabogi er á Benidorm svæðinu. Hann er nálægt fjallaþorpinu Castell de Castells. Ef ferðast er suður frá San Antonio á E-15 á að beygja vestur á exit 63 og þá eru um 27 km að þorpinu. Fá svo betri leiðbeiningar þar. Gaman er að fá sér göngutúr upp að boganum og njóta útiverunnar.